ក្នុងរយៈពេលប៉ុន្មានឆ្នាំចុងក្រោយនេះ ពិភពលោកកំពុងប្រឈមនឹងបញ្ហាបម្រែបម្រួលអាកាសធាតុ។ ផ្តើមពីការប្រែប្រួលអាកាសធាតុខ្លាំង រហូតដល់សីតុណ្ហភាពក្នុងសកលលោកបានកើនឡើង ជាបុព្វហេតុធ្វើឱ្យភពផែនដីរបស់យើងប្រឈមនឹងវិបត្តិបរិស្ថាន។ វាជាបញ្ហាប្រឈមដ៏ចម្បងមួយ ដែលយើងត្រូវចាត់វិធានការដោះស្រាយ ដើម្បីឆ្ពោះទៅរកនិរន្តរភាព និងស្វែងរកដំណោះស្រាយប្រកបដោយនវានុវត្តន៍ ដើម្បីបន្ស៊ាំ និងកាត់បន្ថយការប្រែប្រួលអាកាសធាតុនេះ។ ដំណោះស្រាយមួយក្នុងចំណោមដំណោះស្រាយទាំងនោះ គឺការបង្កើតសួនសាលាមេត្រីនៅតាមសាលារៀន ការលើកកម្ពស់កសិកម្មឆ្លាតវៃដែលធន់នឹងអាកាសធាតុ និងការអនុវត្តកម្មវិធីបំណិនជីវិតសម្រាប់កុមារ—អង្គការ អេហ្វ អេក កម្ពុជា គាំទ្រឱ្យមានសួនសាលាមេត្រីចំនួន ១៧ នៅខេត្តសៀមរាប និងខេត្តឧត្តរមានជ័យ។

តើសួនសាលាមេត្រីជាអ្វី?

វាជាកន្លែងរៀន និងអនុវត្តជាក់ស្តែងសម្រាប់កុមារនៅតាមសាលារៀន ដែលផ្តោតលើជំនាញបំណិនជីវិតកសិកម្ម ដូចជាការដាំដំណាំ និងដើមឈើ ការចិញ្ចឹមសត្វ និងជំនាញវារីវប្បកម្ម ព្រមទាំងការអនុវត្តគោលការណ៍ស្ដីពីកសិកម្មឆ្លាតវៃដែលធន់នឹងអាកាសធាតុ និងការកាត់បន្ថយការប្រែប្រួលអាកាសធាតុ។ សួនច្បារទាំងនេះប្រើប្រាស់គោលការណ៍មិនប៉ះពាល់ដល់បរិស្ថាន ដូចជាការប្រើជីកំប៉ុស វិធីសាស្រ្តរួមបញ្ចូលការគ្រប់គ្រងសត្វចង្រៃ និងបច្ចេកទេសសន្សំសំចៃទឹក។ តាមរយៈកម្មវិធីសួនមេត្រី សិស្សានុសិស្សអាចស្វែងយល់ និងអនុវត្តបច្ចេកទេសកសិកម្មឆ្លាតវៃដែលធន់នឹងអាកាសធាតុនៅតាមសាលារៀន ហើយអនុវត្ត សួនដំណាំនេះនៅតាមផ្ទះ ដើម្បីកាត់បន្ថយដានកាបូនរបស់ពួកគេ។

សារៈសំខាន់នៃសួនសាលាមេត្រី

១. ឱកាសសិក្សា៖ សួនសាលាមេត្រីផ្តល់បទពិសោធន៍សិក្សាដល់សិស្សានុសិស្ស។ វាផ្តល់ឱកាសពិសេសមួយសម្រាប់ពួកគេ ដើម្បីស្វែងយល់ពីសារៈសំខាន់នៃកម្មវិធីកសិកម្មប្រកបដោយនិរន្តរភាព បច្ចេកទេសអនុវត្តកសិកម្មឆ្លាតវៃដែលធន់នឹងអាកាសធាតុ ជីវចម្រុះ និងមុខងារប្រព័ន្ធអេកូឡូស៊ី។ ជាងនេះទៅទៀត កុមារអនុវត្តតាមលំណែនាំមេរៀននៅក្នុងថ្នាក់ ដូចជាមុខវិជ្ជាគណិតវិទ្យា អំណាន និងការសរសេរទៅក្នុងការអនុវត្តសួនសាលាមេត្រីជាក់ស្តែង ផ្តើមពីការអានមេរៀនបច្ចេកទេស និងការណែនាំ រហូតដល់ការគណនាផ្ទៃដី និងធាតុចូល បន្ទាប់មកកត់ត្រាដើម្បីតាមដានលើដំណើរការ និងចុងក្រោយរាយការណ៍ពីលទ្ធផល។

២. ការលើកកម្ពស់ទម្លាប់នៃការបរិភោគដែលមានសុខភាពល្អ៖ តាមរយៈការដាំបន្លែ និងជី សួនសាលាមេត្រីក៏បានជំរុញសិស្សានុសិស្សឱ្យញ៉ាំអាហារស្រស់ៗ និងមានជីវជាតិ។ វាអាចជួយរក្សាអត្រាលើសទម្ងន់និងធាត់មិនឱ្យកើនឡើង និងកែលម្អរបៀបរស់នៅដែលមានសុខភាពល្អ។

៣. ការយល់ដឹងអំពីបរិស្ថាន៖ សួនសាលាមេត្រីលើកកម្ពស់ការយល់ដឹងពីសារៈសំខាន់នៃការអភិរក្ស ជីវចម្រុះ និងផលប៉ះពាល់នៃការប្រែប្រួលអាកាសធាតុ។ សិស្សានុសិស្សអាចស្វែងយល់ពីផលប្រយោជន៍នៃរុក្ខជាតិក្នុងការប្រមូលផ្តុំកាបូន និងរបៀបដែលពួកវារួមចំណែកដល់ការកាត់បន្ថយការប្រែប្រួលអាកាសធាតុ។

៤. ការកៀរគរសហគមន៍៖ សួនសាលាមេត្រីបង្កើតឱ្យមានអារម្មណ៍ថា ជាផ្នែកមួយនៃសហគមន៍ តាមរយៈការចូលរួមរបស់សិស្សានុសិស្ស និងគ្រូបង្រៀនក្នុងការដាំដំណាំ។ វាជំរុញការងារជាក្រុម និងការសហការ ស្របពេលដែលវាជាកន្លែងដែលសិស្សានុសិស្សអាចរៀនជាមួយគ្នា និងពីគ្នាទៅវិញទៅមក។

ការស្វែងយល់ពីបំណិនជីវិត តាមរយៈការដាំដំណាំ

សួនសាលាមេត្រីគឺជាវេទិកាពិសេសមួយសម្រាប់កុមារ ដើម្បីអភិវឌ្ឍជំនាញបំណិនជីវិតផ្សេងៗ។ ផ្តើមពីការធ្វើការងារជាក្រុម និងការដោះស្រាយបញ្ហា រហូតដល់ជំរុញឱ្យមានការអត់ធ្មត់ និងទំនួលខុសត្រូវ ការដាំដំណាំផ្តល់បទពិសោធន៍សិក្សាដល់សិស្ស បន្ថែមពីលើសៀវភៅសិក្សា និងការរៀបចំថ្នាក់រៀនឱ្យផ្សារភ្ជាប់ទៅនឹងការប៉ះពាល់/អនុវត្តផ្ទាល់ ជាជាងការសិក្សាបែបទ្រឹស្តី។

សិស្សានុសិស្សអាចស្វែងយល់ពីសារៈសំខាន់នៃការចិញ្ចឹមបីបាច់ថែរក្សាសារពាង្គកាយមានជីវិត ដោយមានទំនោរទៅរករុក្ខជាតិ។ ពួកគេបានឃើញពីផលប៉ះពាល់វិជ្ជមាននៃសកម្មភាពអនុវត្តរបស់ពួកគេ នៅពេលពួកគេមើលគ្រាប់ពូជដែលដុះពន្លក រុក្ខជាតិលូតលាស់ និងបន្លែប្រមូលផល។ ដំណើរការនេះជំរុញឱ្យមានមោទនភាព និងចេះបង្កើតសមិទ្ធផល បង្កើនទំនុកចិត្ត និងផ្តល់តម្លៃឱ្យខ្លួនឯង។

កសិកម្មឆ្លាតវៃដែលធន់នឹងអាកាសធាតុ៖ ជំហានឆ្ពោះទៅរកនិរន្តរភាព

ការបញ្ចូលការអនុវត្តកសិកម្មឆ្លាតវៃដែលធន់នឹងអាកាសធាតុនៅក្នុងសួនសាលាមេត្រី បង្រៀននូវចំណេះធ្វើកសិកម្មប្រកបដោយនិរន្តរភាពដល់សិស្សានុសិស្ស និងបំពាក់បំប៉នពួកគេនូវចំណេះដឹង ដើម្បីបន្ស៊ាំនឹងការប្រែប្រួលអាកាសធាតុ។ កសិកម្មឆ្លាតវៃដែលធន់នឹងអាកាសធាតុ ផ្តោតលើការកាត់បន្ថយការបំភាយឧស្ម័នផ្ទះកញ្ចក់ ការអភិរក្សធនធានទឹក ការលើកកម្ពស់ជីវៈចម្រុះ ការអនុវត្តបច្ចេកទេសនៃការបន្សុំាភាពធន់នឹងការប្រែប្រួលអាកាសធាតុ និងការបង្កើនផលិតភាព។

សិស្សានុសិស្សអាចមើលឃើញដោយផ្ទាល់ អំពីរបៀបដែលសកម្មភាពអនុវត្តរបស់ពួកគេ រួមចំណែកដល់ការនាំមកនូវបរិស្ថានដែលមានសុខភាពល្អ និងផលិតកម្មកសិកម្មបានល្អនាពេលអនាគត តាមរយៈការអនុវត្តជីកំប៉ុស ការសន្សំសំចៃទឹក និងបច្ចេកទេសដាំដំណាំជាក្រុម។ ការអនុវត្តទាំងនេះផ្តល់ទាំងដំណាំផលផ្លែ និងបំណិនជីវិតជាក់ស្ដែង ដែលអាចយកទៅអនុវត្តជាមួយឪពុកម្តាយរបស់ពួកគេនៅតាមផ្ទះថែមទៀតផង។