ការផ្តល់អាហារបន្ថែមនៅអាយុ ៦ខែ គឺជាដំណាក់កាលដំបូងនៃជីវិតរបស់កុមារដែលចាប់ផ្តើមស្គាល់ពីអាហារ រួមមានរសជាតិ សភាពនៃអាហារ (ទន់ រឹង រាវ) និងរៀនពីរបៀបលេបដុំអាហារ ដូច្នេះវាជាការសំខាន់ណាស់ ដែលអ្នកត្រូវយល់ដឹងពីរបបអាហារ រសជាតិ បរិមាណនៃអាហារ ដែលត្រូវផ្តល់ទៅតាមអាយុរបស់កុមារ និងរបៀបបញ្ចុកឱ្យបានត្រឹមត្រូវ។ អាយុរបស់កុមារដែលនឹងត្រូវផ្តល់អាហារបន្ថែម ត្រូវបានបែងចែងទៅតាមក្រុមអាយុដូចខាងក្រោម៖

១. ពីអាយុ ៦ខែ

២. ពីអាយុ ៦ ទៅ ៨ខែ

៣. ពីអាយុ ៩ ទៅ ១១ខែ

៤. ពីអាយុ ១២ ទៅ ២៤ខែ

៥. ពីអាយុ ២៤ខែ ឡើងទៅ

អាហារបន្ថែមសម្រាប់កុមារអាយុពី៦ខែ

នៅពេលដែលអាយុបាន ៦ខែ ការផ្តល់ទឹកដោះម្តាយតែមួយមុខគត់ គឺមិនគ្រប់គ្រាន់សម្រាប់ការលូតលាស់របស់កុមារទេ។ ដូច្នេះម្តាយ ឬអ្នកថែទាំត្រូវផ្តល់អាហារបន្ថែមជាមួយនឹងការបំបៅទឹកដោះម្តាយ។ អាហារបន្ថែមត្រូវចម្អិនអោយបានឆ្អិនល្អ និងពាតអោយម៉ដ្ឋល្អ។ នេះជាពេលវេលាដំបូងដែលកូនរបស់អ្នកចាប់ផ្តើមស្គាល់ពីអាហារ ក្រៅពីទឹកដោះម្តាយ ដូច្នេះសូមអត់ធ្មត់ និងព្យាយាមបញ្ចុកតាមសម្រួល និងរីករាយជាមួយកូនអ្នក។

ទាំងនេះជាគន្លឹះ៖

១. ប្រភេទអាហារ៖ បបរខាប់គ្រប់គ្រឿងដែលមានត្រីកិនឳ្យម៉ដ្ឋ ស៊ុត ឬសាច់ ល្ពៅ និងបន្លែស្លឹកពណ៌បៃតងចាស់ដែលចិញ្រ្ចាំពាតឳ្យម៉ដ្ឋ។

២. ចំនួនដង៖ ២ ដងក្នុង១ថ្ងៃ

៣. បរិមាណអាហារ៖ ផ្តល់ពី ២-៣ ស្លាបព្រាបាយក្នុង ១ ពេលៗ។

សម្គាល់៖

– លាងដៃរបស់អ្នក និងដៃរបស់កូនអ្នកជាមួយទឹក និងសាប៊ូ រៀងរាល់ពេលមុនបញ្ចុកអាហារដល់កូន

– ដាក់កូននៅលើភ្លៅរបស់អ្នក ហើយបញ្ចុកអាហារដោយសកម្ម

– ចូរផ្តល់អាហារឱ្យកូនតាមបរិមាណ និងព្យាយាមរហូតអាហារអស់ពីចាន

– សូមរក្សាចន្លោះពេលយ៉ាងហោចណាស់ ៣០នាទីពីការបំបៅដោះកូន និងបញ្ចុកអាហារ។

#HealthTips #PNC #MealforChild #FlourishingCommunities #FHCambodia